القلب من كثر الهواجيس قزان=ما يستريح من الدهر ربع ساعه
يا غافر الزلات يا وال الاحسان=تجعل من التقوى لنفسي بضاعه
انا على لان (ن) وربعي على لان=متخالف(ن) رايي وراي الجماعه
ماني بشاوي ً يربت على الضان=ويعطي لطلاب الجنايا رتاعه
أنا ولد علي سلايل كحيلان=ربي حلقني لسبايا وداعه
الناس ماتسقيك الى صرت عطشان=ولا يشرب المظمى حذا من ذراعه
إضرب على الكايد الى صرت بحلان=وعند الولي وصل الحبل وانقطاعه
ولا فهم الله غير حضرة سليمان=و لا صفا كدره لبني اشاعه
عيب(ن) على اللي يتقي عقب مابان=ويرضي طمان النفس عقب ارتفاعه
اما تجيب عقود حص ومرجان=ولا فــ هي لابليس طار بشعاعه
وطرابة الدنيا من الفجر دخان=واكرارة (ن) باطراف خطو الصعاعه

يا مل قلب(ن)بين خمسة وعشرين=هجس وهاجوس وعدل(ن) ومايل
يديرهن دولاب الافكار تسعين=بالصدر ينشر دقهن و الجلايل
و اصبحت منهن جايز(ن) كود ثنتين=سعدى و مصقول(ن) يداوي الغلايل
وخماسي(ن) غمق(ن)صوابه وجوزين=إلى اقرنوا قحص المهار الاصايل
يا دارنا من جاك جيناه عجلين=بالليل نسري والصفر والقوايل
فأن كانهم عنا بالانشاد محفين=من الراس ما نعتاز دز الرسايل
ناتي على سربة(ن) وقم الالفين=كن الشهر به ديدحان المسايل
حضر الجبل والبدو نلحق صليبين=يتلن لنا جملات سود الجدايل
جينا صباح وهم لنا مستكنين=وثار الدخن من حر صلو الفتايل
حصل لنا عقب المواصل وفا دين=وراعي السلف ردت عليه الجمايل
عجاجة(ن) تجلى صدا القلب ياحسين=دبيلة(ن) ما مثلها بالدبايل
كم ميمر(ن) داجو عليه الغلامين=خلو دماغه عن علابيه مايل
ربعي مروية السيوف المسانين=خلة صفا بقعا من الدم سايل
اللي ذبحت بشذرة السيف تسعين=منهم ولاني عن طردهم بسايل
ذبحت ابو صالح سعوط المجانين=ودعيت دم الشيخ بالقاع سايل
واللي وطينا ما تشوفه محبين=والكذب تنفاه العلوم الصمايل
جونا يبون ديارنا والبساتين=يبغون منزلهم قفار(ن) و حايل
واليوم يبغونا وحنا معييين=نجدع بحد السيف من جاه عايل
وادلى على ربعه بسوق الفرامين=فيدة عماهم تايهين الدلايل
يصيح مثل البارحه ما هنا شين=ولا حصل له كود قطع الوصايل
يقول جده يوم صولة هل الدين=قادوا عليهم ذاهبين الجمايل
واللي عطوا حق الديار الهزازين=وحنا الى عدت علوم القبايل
ربع(ن) على حرب المعادي ضريرين=من سابق(ن) كسابة(ن) للنفايل
واغداه بالمكحول خرط الفراقين=وعرضاتهم في مشرفات النثايل
اطاع حكم الذايدي والسلاطين=وقبله لويبان(ن) رمي بالحبايل
ناس(ن) يبون العز منهم ذليلين=وش قال مشعان(ن) بهم بالاوايل
عندي لهم اللي يلبسون التوامين=الى اجذبوا شروى بروق المخايل
يتلون عيد الضيف ريف المساكين=الشيخ ابو متعب عزيز النزايل
إن سلم راس الشيخ حنا عزيزين=نرجيه من معطي العطايا الجزايل
الى بغا امر(ن) ما يطيع المشيرين=الحيد شيال الحمول الثقايل
وصلو على قنديل سكن الحجازين=راعي المقام المعتلي والوسايل
مني عدد ما شمع اللبن بالطين=او ما لبيت الله تشد الرحايل