إرقد ملأ عينك وخل السهر لــــي
خل السهر لمعذب القلب وإرتـــاح

لاباس لو زاد الهوا منك حملـــــي
خلن على همي وخلك بالأفــراح

لايشغلك جرحي ولاتلتفـت لـــي
خلك على هجرٍ عليه العمـــر راح

بديـت مشـوار الهـوا بالتغلــــــــي
وأتلاه حتى بالحكي صرت شحّاح

أستاهل التعذيب واللي حصل لي
حبيت من ظن الهوا لعب وإمــزاح

يرضيك أنا أدري كلما يدني أجلي
لا شك راضيك ولو كنت ذبّــــــاح

مهديك أنا عمري وعنه متخلــــي
مايوم حسبت الخساير والأربــــاح

تجفى وتنسـى خاطـرٍ مايملـــــي
حبك بكل اللي جرى منك رجّــاح

خلك على مبداك لا تنضغن لـــي
وأنا على صبري وللضيق مفتــــاح

مسموح مني كـل يـومٍ يزلــــــــي
مهما تعذبني جروحي والأتـــــراح


للشاعر : محمد العبيد الله